ပထမဦးဆုံး ရှေ့တန်းတိုက်ပွဲ အဆက်

အရင်ပို့စ် မှအဆက်



ဖိုးဇော်နဲ့အတူ ပါလာတဲ့ ဆေးမှူးက သွေးမူးနေလို့ ကျွန်မတို့ကို ဘာမှမပြောနိုင်ပဲ ရောက်တာနဲ့ ချက်ချင်း လှဉ်းပေါ်ကဆင်းပြီး အိမ်တအိမ်ပေါ်မှာ သွားအပြီး နားယူနေလိုက်တယ်။ ဖိုးဇော်ကို နွားလှည်းပေါ်ကနေ အိမ်ရှေ့ သစ်ပင်အောက်မှာ အသင့်ခင်းထားတဲ့ ဖျာပေါ်ကို ရဲဘော်တွေက သယ်ချပြီး သင့်တော်တဲ့ အနေအထားအတိုင်း ရွှေ့ထားလိုက်ပါတယ်။ ဖျာပေါ်ရောက်တဲ့အချိန်မှာ ကျွန်မကြည့်လိုက်တော့ သူ့လည်ပင်း ညာဘက်ခြမ်းမှာ ဒဏ်ရာရထားပြီး ပြတ်နေတဲ့ လည်ပင်း သွေးကြောကြီးက ဖြူဖွေးပြီး ထွက်နေတာကို တွေ့ရတယ်။ ကျွန်မက ချက်ချင်း သူ့လက်ကောက်ဝတ်မှာ သွေးခုန်နှုန်း ((Radius Pulse) ကို စမ်းဖို့ ထိလိုက်တော့ အေးစက် စေထိုင်းနေပြီး သွေးခုန်နှုန်းကို စမ်းလို့မရဘူး။ ကျွန်မစိတ်တွေ တူပူပြီး ဘာလုပ်လို့ လုပ်ရမှန်းမသိ ဖြစ်နေတယ်။

”ဖိုးဇော် ဖိုးဇော်” လို့ ခေါ်ရင်း ကျွန်မ နားကျပ်နဲ့ သူ့နှလုံးကို နားထောင် ကြည့်တော့လည်း စိတ်တွေက ထူပူနေသလို နားထဲမှာလည်း ရှင်းရှင်းလင်းလင်း ဘာမှမကြားရပဲ ထူပူပြီး ရှုပ်ထွေးနေတယ်။ ဒါနဲ့ ကျွန်မက Adrenaline (နှလုံးနိုးဆေး) ထိုးပြီး နှလုံးနိုး ကြည့်ရအောင်လို့ ပြောတော့ တခြားဆေးမှူး ရဲမေတယောက်က Adrenaline ကို စုပ်ပေးတယ်။ Drip သွင်းဖို့ ဆိုပြီး Drip ၀ိုင်းပြင်တဲ့သူက ပြင်နဲ့ ဆေးမှူးမဟုတ်တဲ့ တခြား ရဲမေနှစ်ဦးကလည်း ကျွန်မတို့ကို ၀ိုင်းလုပ်ပြီး အလုပ်များနေကြတယ်။ ကျွန်မက သွေးကြောလိုက်ရှာနေတယ်။

“ရော့ ဒီမှာ Adrenaline ရပြီ” တခြားဆေးမှူးရဲမေက Sarying ထဲ ဆေးစုပ်ထည့်ပြီး ထိုးဖို့အဆင်သင့် လုပ်ပေးပြီးတဲ့ အချိန်ထိ ကျွန်မက သွေးကြောကို ရှာမတွေ့သေးဘူး။ နောက်ဆုံးတော့ တတောင်ဆစ်အထိ ခေါက်တင်ထားတဲ့ ပြောက်ကျား ယူနီဖေါင်း အင်္ကျီလက်ခေါက်ကို လက်မောင်းရင်းအထိ ရွှေ့တင်လိုက်ပြီး တတောင်ဆစ်ရှေ့နားက သွေးကြောကိုရတယ်။ ကျွန်မ အပ်ကို သွေးကြောထဲ သွင်းလိုက်တာ အပ်က သွေးကြောထဲကို တည့်တည့် ရောက်ပေမယ့် သွေးကမလိုက်လာဘူး။ အဲဒီတော့ သွေးဆုတ်နေတာ တတောင်ဆစ်တောင် ကျော်နေပြီပဲ ဆိုတဲ့အသိနဲ့ ဖြစ်ချင်ရာဖြစ် သွေးမလိုက်လည်း အကြောင်းမဟုတ်ဘူး Sarying ထဲ သွေးလိုက်လာတာကို မစောင့်တော့ပဲ Sarying ထဲက ဆေးကို သွေးကြောထဲ ရောက်အောင် အရှိန်နဲ့ ထိုးလိုက်ရင်တော့ နှလုံးဆီကို တချို့တ၀က်တော့ ရောက်မှာပဲလို့ အထင်နဲ့ Sarying ကို လက်မနဲ့ အားယူပြီး ဖိသွင်းကြည့်တာတောင် လုံးဝ မ၀င်တော့ဘူး။

ကျွန်မလည်း Adrenaline သွင်းလို့ ပြန်ပြီး နှလုံးခုန်လာ သတိပြန်ရလာတဲ့ လူနာတွေပဲ တွေ့ဖူးပြီး ဒီလိုမျိုး ဆေးတောင် သွင်းလို့မရတော့တဲ့ လူနာမျိုးတခါမှ မတွေ့ဖူးတော့ စိတ်တွေ ထူပူနေပြီး ”ဘုရား ဘုရား” လို့ စိတ်ထဲမှာ တမိတယ်။ ယုံရခက်ခက်နဲ့ မယုံချင်ပေမယ့် သူ့အခြေအနေက မယုံလို့ မဖြစ်တော့ဘူး။ အသက်မရှူတော့ဘူး၊ နှလုံးမခုန်တော့ဘူး၊ မခုန်တော့ပေမယ့် သွေးရှိနေသေးရင် နှလုံးကို ပြန်နိုးနိုင်ရင် မျှော်လင့်ချက်က ရှိနိုင်သေးတယ် အခုတော့ သွေးလုံးဝ မရှိတော့ဘူးဆိုတော့ သဘောပေါက်သင့်ပြီ။ တိုက်ပွဲ မဖြစ်ခင်လေးကမှ ကျွန်မတို့ကို လိုက်စနေတဲ့ သူ့ပုံကို မြင်ယောင်မိပြီး ဆောက်တည်ရာမရနဲ့ ဘာဆက်လုပ်လို့ လုပ်ရမှန်းမသိ ဘာပြောလို့ ပြောရမှန်းလည်း မသိတော့ပဲ နောက်ဆုံးတော့ ကျွန်မ ဘာမှပြောမနေ လုပ်မနေတော့ပဲ အားရပါးရ ထိုင်ငိုချလိုက်တော့တယ်။

ဒီအချိန်မှာ ရန်သူကလည်း ကျွန်မတို့ဘက်ကို လိုက်လာနေတယ်လို့ သိရတယ်။ သူတို့တပ်စုက ဆေးမှူးက ကျွန်မတို့ကို ဘာမှ မပြောပြခဲ့ပဲ သွေးမူးလို့ဆိုပြီး သွားအနားယူနေလိုက်တာ သူလည်း ယုံရခက်ခက်နဲ့ ကျွန်မတို့ နှလုံး ပြန်နိုးလို့ ပြန်ရရင်လည်း ရနိုင်တယ်လို့ မျှော်လင့်ပုံရပါတယ်။ အမှန်က ဖိုးဇော်က တိုက်ပွဲထဲမှာတင် သူ့တပ်စုက ဆေးမှူးလက်ထဲမှာ ဆုံးခဲ့တာ ဖြစ်တယ်။ ဒါပေမယ့် ရုတ်တရက်ကြီး ဖြစ်သွားတယ်ဆိုတော့ အားလုံးက နှမြှောတသပြီး မယုံချင်ကြပဲ ကျွန်မတို့ ကြိုးစားကြည့်လို့ ရရင်လည်း ရနိုင်သေးတယ် ဆိုတဲ့ မျှော်လင့်ချက်က ရှိနေကြပြီး တကယ်မရတော့ဘူးဆိုတာ သေချာမှပဲ တပ်ခွဲမှူးက ဖိုးဇော်ဆုံးပြီဆိုတာ အတည်ပြုပြီး တပ်ရင်းကို သတင်းပို့ဖို့ ပြင်ဆင်ခဲ့ပါတယ်။

ဖိုးဇော်ဆုံးပြီဆိုတာကို အတည်ပြုပြီးတာနဲ့ ဟိုဘက်ရွာကို မရောက်ခင် ဖိုးဇော်အလောင်းကို မြေမြှုပ်ဖို့ ပြင်ဆင်ကြတယ်။ သူ့တပ်ခွဲနှင့်အတူ ဒေသခံတပ်ခွဲ (၁) က တပ်စိတ်တစိတ်က ဒီရွာနဲ့ ဆက်သွားမည့် ရွာအကြားမှာရှိတဲ့ ခပ်လှမ်းလှမ်း တောင်ကုန်းတနေရာမှာ ဖိုးဇော် အလောင်းကို မြေမြုပ်ဖို့ အရင်ထွက်ခွာကြပြီး ခဏကြာတော့ ကျွန်မတို့ တပ်ခွဲ (၁) က လူနာတွေကို သယ်ပြီး တခြားရွာကို သွားနေကျ လမ်းအတိုင်း ဆက်သွားခဲ့ပါတယ်။ လက်ရှိလူနာတွေကလည်း အနာဆေးကြောပြီး ဆေးထည့် ထိုးဆေး သောက်ဆေး ပေးထားပေမယ့် ရှေ့တန်းမှာ ရေရှည်အနေနဲ့ စိတ်မချရတဲ့အတွက် ဟိုဘက်ရွာ ရောက်ရင် သူတို့ကို ဆင်ငှားပြီး တပ်ရင်းပို့ဖို့ ပြင်ဆင်ရဦးမယ်။

ရင်ဘတ်မှာ ထိပြီး အစာမစားနိုင် မသောက်နိုင်လို့ Drip ဗူးချိတ်ထားပေးထဲ့ လူနာက အဖျားဝင်လာပြီး နည်းနည်း စိုးရိမ်ရလို့ ဆေးတချို့ ထပ်ပေးထားရပြီး လူနာကို ရဲဘော်နှစ်ဦးက ပုခက်ကို ၀ါးလုံးမှာ ကြိုးချည်ပြီး ရှေ့တယောက် နောက်တယောက်ထမ်း ကျွန်မက အလယ်မှာ လူနာပုခက်ဘေးနားကနေ လူနာကို ချိတ်ပေးထားတဲ့ Drip ဗူးကို တလမ်းလုံး ကိုင်မြှေက်ပြီး ခရီးဆက်ခဲ့ပါတယ်။ လမ်းတ၀က်ခန့်မှာ သေနတ်ဖေါက်သံတွေ ကြားတော့ ရန်သူအနီးကပ် လိုက်ချောင်းပစ်ပြန်ပြီ ထင်လို့ ရင်ထဲ ထိတ်ကနဲ ဖြစ်သွားပေမယ့် သေနတ်သံတွေက AK နဲ့ ၁၆ အသံတွေပဲဆိုတာ သတိထားမိမှ ဖိုးဇော် အလောင်းကို မြေဖို့ခါနီး အမိန့်တော်ပြန်တယ် ဆိုတာ သဘောပေါက်လိုက်တယ်။ တပ်ခွဲမှူးကလည်း ဒါအမိန့်တော်ပြန်တာလို့ ပြောလိုက်တယ်။

"ရဲဘော် ဖိုးဇော် သင်ကား အမိမြန်မာပြည် ဒီမိုကရေစီနဲ့ လူ့အခွင့်အရေးအတွက် တာဝန်ကျေပြွန်ခဲ့ပါပြီ။ သင့်ရဲ့ စွန့်လွှတ်မှုကို ကျွန်ုပ်တို့ မြန်မာနိုင်ငံလုံးဆိုင်ရာ ကျောင်းသားဒီမိုကရက်တစ် တပ်ဦးမှ ကျေးဇူးတင် ဂုဏ်ပြုပါတယ်။ ယနေ့ကစပြီး သင်ဟာ ကျွန်ုပ်တို့ မြန်မာနိုင်ငံလုံးဆိုင်ရာ ကျောင်းသားများဒီမိုကရက်တစ် တပ်ဦးနဲ့လုံးဝ မသက်ဆိုင်တော့ပါ။ သင်သွားလိုရာ သွားနိုင်ပြီ ရဲဘော်ဖိုးဇော်” ဆိုတဲ့ ဧည့်သည်တပ်ခွဲ တပ်ခွဲမှူးရဲ့ အမိန့်စာဖတ်တဲ့ အသံကို စိတ်မှန်းနဲ့ ကြားယောင်မိလို့ ကျွန်မ မဖေါ်ပြတတ်အောင် ၀မ်းနည်းပက်လက် ခံစားမိပြီး မျက်ရည်ကျ မိပါတယ်။

 တောက်လျှောက် အတူတိုက်ပွဲဝင်လာတဲ့ ရဲဘော်တဦးကို သေတာနဲ့ ချက်ချင်းမှောင်းထုတ်တဲ့ ဒီအမိန့်တော်ပြန်တာကြီးကို မလုပ်လို့မရဘူးလား မသိဘူးလို့ တွေးနေတဲ့အချိန်မှာ ပုခက်ထဲက လူနာရဲဘော်က "အာခေါင်ခြောက်တယ်" ဆိုလို့ ဘေးအိတ်ထဲမှာ ရေဗူးနဲ့ ထည့်ထားတဲ့ အုန်းသီးနုရည်ကို ပါးစပ်စိုရုံ ထည့်ပေးရ၊ ကျန်တဲ့ လက်တဘက်ကလည်း Drip ဗူးကို ကိုင်မြှောက်ထားရဆိုတော့ ဖိုးဇော်ကို မှောင်းထုတ်တဲ့ အမိန့်တော်ပြန်စာနဲ့ ပတ်သက်ပြီး ကြာကြာ ခံစားနေဖို့ အချိန်မရလိုက်ဘူး။

သွားနေတဲ့ ရွာကို ရောက်တဲ့အခါမှာတော့ လူနာပါလာတယ် ဆိုတာသိတာနဲ့ ရွာသားတွေက လူနာအတွက် လိုအပ်တဲ့ ဓါတ်စာတွေအတွက် လိုနေသေးမရှိအောင် ပြင်ဆင်ထားပေးပါတယ်။ လူနာကို တပ်ရင်းပြန်ပို့ဖို့အတွက် ကရင်ရွာတွေမှာ တပ်က ရဲဘော်တချုိ့နဲ့အတူ ဆင်သွားရှာပေးပါတယ်။ ဧည့်သည်တပ်ခွဲကလည်း သူတပ်ခွဲ လှုပ်ရှားတဲ့ နယ်မြေကို မကြာခင်ပြန်မှာ ဖြစ်တယ်။ အဲဒီ ကြားကာလ နားနေတဲ့ အချိန်လေးမှာ ဂီတာတီးတတ်တဲ့ ရဲဘော်တချို့က ရွာက ကာလသားတွေဆီက ဂီတာငှားပြီးတော့ ကျဆုံးသွားတဲ့ ဖိုးဇော်အတွက် သီချင်းတွေကို လွမ်းလွမ်းဆွေးဆွေး သီဆိုကြတယ်။

 "ဒီမိုကရေစီ ရရှိရေးအတွက် ရှေ့တန်း တနေရာမှာ အသက်ပေးသွားတဲ့ သူငယ်ချင်းတို့ရေ..အသေစောလို့ နှမြှောမိပါတယ်… ဒီမိုကရေစီ ရရှိသွားလို့ တို့များအိမ်ယာ ပြန်ကြတဲ့အခါ ဆီးကြိုနေမယ့် မင်းတို့မိဘ မောင်နှမကို တို့များဘယ်လို ပြောပြရမလဲ တွေးရင်းတွေးရင်း ၀မ်းနည်းမိပါတယ်…" ဆိုတဲ့ သီချင်းကို လွမ်းဆွတ်တသစွာနဲ့ သီဆိုကြပါတယ်။ ဒါပေမယ့် လက်ရှိ အခြေအနေမှာတော့ ဖိုးဇော် ဘယ်မှာ ကျန်ခဲ့တယ် ဆိုတာနဲ့ ပတ်သက်ပြီး ပြည်တွင်းက မိဘ မောင်နှမ ရင်းတွေကို မပြောခင် သူတို့တပ်ခွဲ လုပ်ရှားတဲ့ နယ်မြေ ပြန်ရောက်ရင် အဲဒီက မိဘပြည်သူတွေ မေးရင် ဘယ်လို ပြောပြရမယ် ဆိုတာ အရင် စဉ်းစားရလိမ့်မယ်။ ဧည့်သည်တပ်ခွဲ အတွက် ကျွန်မ တကယ်ပဲ ၀မ်းနည်းမိပါတယ်။ သီချင်းကို ဆက်လက်နားထောင်နိုင်ပါတ်ယ။

ဒီသီချင်းရဲ့ မူလအစက မြောက်ပိုင်း ရဲဘော်ရဲမေတွေက စပ်ဆိုသီဆိုထားပြီး ကျွန်မတို့ တောင်ပိုင်းက နောက်တန်း၊ ရှေ့တန်း ရဲဘော်တွေကလည်း အဲဒီတုန်းက ကျဆုံးသွားတဲ့ ရဲဘော်တွေကို ဂုဏ်ပြုကာ ရင်ထဲက ခံစားချက်အပြည့်နဲ့ ဆွေးဆွေးမြေ့မြေ့ သီဆိုလေ့ရှိတဲ့ သီချင်းဖြစ်ပါတယ်။ ၁၉၉၄ ခုနှစ်တုန်းက ABSDF ဗဟိုဌာနချုပ် ဒေါင်းဂွင်က ထုတ်တဲ့ ခေတ်သစ်ကောင်းကင်ပျံမည့်ငှက်များ အခွေမှာလည်း ဒီသီချင်းကို ရဲမေ မစန်းစန်းမြင့်က ပြန်ဆိုခဲ့ဖူးပါတယ်။ 

အခုဒီဗွီဒီယိုမှာ ဆိုထားတာက လွန်ခဲ့တဲ့ အနှစ်နှစ်ဆယ်က ABSDF မြောက်ပိုင်းဒေသမှာ မကဒတ မြောက်ပိုင်းဥက္ကဌ ကိုထွန်းအောင်ကျော်နဲ့ မတရား သတ်ဖြတ်ခံခဲ့ရတဲ့ မြောက်ပိုင်းရောက် ရဲဘော်တွေအတွက် အသက်ရှင်လွတ်မြောက်လာသူ တပ်ဖွဲ့ဝင်ဟောင်းတွေက မန္တလေးမှာ 12/02/12 က ကျင်းပတဲ့ ၀မ်းနည်း အောက်မေ့ဖွယ် အခမ်းအနားမှာ တောတွင်းအမှတ်တရအနေနဲ့ သီဆိုထားပါတယ်။ မကြားရတာ ကြာပြီဖြစ်တဲ့ ဒီသီချင်းကို အခုလို ရုတ်တရက် ပြန်ကြားရတဲ့အချိန်မှာ ကျွန်မအတွက် အဟောင်းတွေကို အသစ်ပြန်ဖြစ်သွားစေခဲ့ပါတယ်။ ထူနည်းအတူ မကဒတမှာ ဒီသီချင်းနဲ့ပတ်သက်ပြီး အမှတ်တရ ရှိခဲ့ဖူးသူ အားလုံးကလည်း ကျွန်မနဲ့ တူညီတဲ့ ခံစားမှုကို ဒီသီချင်းလေးက ပေးမှာ သေချာလှပါတယ်။


ဒီတိုက်ပွဲက ကျွန်မ ရှေ့တန်းမှာ ကြုံဖူးတဲ့ တိုက်ပွဲတွေအနက် ပထမဦးဆုံး ကြုံရပြီး အရှုံးနဲ့ တိုးတဲ့ တိုက်ပွဲ၊ ဆေးမှူးဘ၀မှာ ပထမဦးဆုံး သေနတ်ဒဏ်ရာ လတ်လတ် ဆတ်ဆတ်ကို တွေ့ဖူးတဲ့ တိုက်ပွဲ လည်းဖြစ်၊ ကျဆုံးခဲ့တဲ့ ရဲဘော်တွေနဲ့ ဒဏ်ရာရတဲ့ ရဲဘော်တွေ အားလုံးဟာ ဧည့်သည်တပ်ခွဲက ရဲဘော်တွေ ဖြစ်တဲ့အတွက် ဒီတိုက်ပွဲကို ကျွန်မ ဘယ်တော့မှ မေ့မှာမဟုတ်ပါဘူး။ ကြုံခဲ့ဖူးတဲ့ တိုက်ပွဲတွေမှာ အခုလို ကိုယ့်ဘက်က ရှုံးတာ ရှိသလို နိုင်တဲ့ တိုက်ပွဲတွေလည်း ရှိခဲ့ပါတယ်။ ဒါပေမယ့် ကျွန်မတို့ဟာ လူကိုသတ်ချင်လို့ တိုက်နေတာ မဟုတ်ပဲ အာဏာရှင် စနစ်ကိုသာ တိုက်နေတာ ဖြစ်တဲ့အတွက် ဘယ်သူပဲ ရှုံးရှုံးနိုင်နိုင် တိုက်ပွဲမှာ ဘယ်သူ့ဘက်ကပဲ ကျကျ ကျွန်မ မပျော်ပိုက်ခဲ့ပါဘူး။ ရှေ့တန်းမှာ ကျွန်မတို့ ရဲဘော်တွေ အများကြီး အသက်ပေးခဲ့ရတယ်။ ထိုနည်းအတူ ရန်သူဘက်ကလည်း ကျဆုံးတာ အများကြီး ရှိခဲ့ပါတယ်။ နှစ်ဘက်စလုံးကတော့ တိုင်းပြည်အတွက် ပေးဆပ်ကြတယ်လို့ ခံယူကြပေမယ့် ရတဲ့ ရလဒ်ကတော့ ဘယ်သူမှ ပေးဆပ်ရတာနဲ့ မတန်ခဲ့ပါဘူး။ ဒီအဖြစ်ပအပျက်တွေက ကျွန်မမျက်စိထဲက ဘယ်တော့မှ ထွက်ခွါသွားမှာ မဟုတ်တဲ့အတွက် ဘယ်တော့မှလည်း မေ့ပစ်လို့ ရနိုင်တဲ့ အဖြစ်အပျက်တွေ မဟုတ်ပါဘူး။ တကယ်တော့ အနှစ် ၂၀ အစိတ်ဆိုတဲ့ အချိန်ကာလက ကျွန်မတို့ ABSDF ရဲဘော်ရဲမေဟောင်းတွေရဲ့ ရင်ထဲက ခံစားမှုတွေကို ပြောင်းလဲနိုင်စွမ်းမရှိ၊ ဟောင်းနွမ်းဆွေးမြေ့ အောင် လုပ်နိုင်စွမ်း မရှိပါဘူး။




ကျွန်မတို့ နိုင်ငံမှာ ဒီလိုဆိုးရွားတဲ့ ခေတ်စနစ်ဆိုး မရှိခဲ့ရင် ဒီလို အဖြစ်ပျက်မျိုးတွေလည်း ကြုံတွေ့စရာ အကြောင်းမရှိပါဘူး။ ကျွန်မတို့ ရှေ့တန်းဒေသာကို သွားတာ ပြည်သူလူထုနဲ့ ထိတွေ့ပြီး ဒီမိုကရေစီနဲ့ လူ့အခွင့်အရေးတွေကို ပြည်သူတွေကြားမှာ အကောင်အထည်ဖေါ်ဖို့ သွားတာဖြစ်တယ်။ ကျွန်မတို့နိုင်ငံမှာ မိမိဆန္ဒကို လွတ်လပ်စွာ ထုတ်ဖေါ်ပြသ စည်းရုံးပိုင်ခွင့် မရှိလို့ ပြည်သူလူထုဆီကို သွားရာမှာ လက်နက်ကို ကိုင်ဆောင်ပြီး သွားမှရောက်ပါတယ်။ တကယ်လို့ ကျွန်မတို့ တပ်တွေသာ ပြည်သူလူထုကြားကို မရောက်တော့ပဲ ကင်းကွာသွားရင် ပြည်သူလူထုကို ဒီမိုကရေစီနဲ့ လူ့အခွင့်ရေး အကြောင်း၊ ဖက်ဒရယ် ပြည်ထောင်စုအကြောင်း ပြောပြမည့်သူ မရှိတော့ပဲ ပြည်သူလူထုဟာ စစ်အာဏာရှင်တွေ ချယ်လှယ်သမျှ ခံနေရမှာ ဖြစ်ပြီး ဒီမိုကရေစီနဲ့ လူ့အခွင့်ရေးကို မေ့လျော့သွားနိုင်ပြီး မြန်မာပြည်ဟာလည်း ဒီထက်ပိုပြီး အခြေအနေ ဆိုးသွားနိုင်ပါတယ်။ ဒါကြောင့်မို့ ကျွန်မတို့ဟာ လွတ်လပ်စွာ ပြောဆို စည်းရုံး ဖွင့်ဟ ပိုင်ခွင့် မရှိတဲ့ နိုင်ငံတခုမှာ လူထုကြားကို ထိုးဖေါက်ပြီး ပြည်သူလူထုအတွက် ဒီမိုကရေစီ လူ့အခွင့်ရေး လုပ်ငန်းစဉ်တွေကို ဖေါ်ဆောင်နိုင်ဖို့ဆိုတဲ့ လိုအပ်ချက်အတွက် လက်နက်ကိုင် လမ်းစဉ်ကို ဆုပ်ကိုင်ရတာ ဖြစ်ပါတယ်။

ဒီလို လက်နက်ကိုင်လမ်းစဉ်ကို ဆုပ်ကိုင်ပြီး တော်လှန်ခဲ့တဲ့ ကျွန်မတို့တွေဟာ ရှေ့တန်းဒေသတွေမှာ အန္တရယ် သိပ်များခဲ့ပါတယ်။ ကျွန်မတို့ တပ်ရင်းမှာ ရှေ့တန်းဆင်းခွင့် တောင်းဆိုတုန်းက ရှေ့တန်းမှာ အန္တရယ်များတယ်လို့ ခေါင်းဆောင်တွေ ပြောတာကို ကျွန်မ မငြင်းပါဘူး။ ဒါပေမယ့် မိန်းကလေးတွေမှ အန္တရယ်များတာ မဟုတ်ပါဘူး။ နိုင်ငံရေးပြဿနာကို မဖြေရှင်းနိုင်လို့ စစ်ပွဲတွေ မငြိမ်းသရွေ့ မြန်မာပြည်မှာ ဘယ်သူမဆို တယောက်မှ အန္တရယ်နဲ့ မကင်းပါဘူး။ ပြည်တွင်းစစ်ကြောင့် မြန်မာပြည်ဟာ အဆင်းရဲဆုံး နိုင်ငံဖြစ်လာခဲ့ပါတယ်။ စစ်အာဏာရှင်စနစ်သာ မရှိခဲ့ရင် ကျွန်မတို့ မြန်မာနိုင်ငံဟာ အခုလို စစ်ပွဲတွေ ဖြစ်နေစရာမလိုပဲ တိုင်းရင်းသား အချင်းချင်း စည်းလုံး ညီညွတ်စွာနဲ့ လက်တွဲပြီး လူမျိုး၊ ဘာသာ၊ ကျားမ၊ လူတန်းစား မခွဲခြား အရည်ချင်းရှိလျင် ရှိသလို ငြိမ်းချမ်း၊ သာယာ၊ လှပ တိုးတက်ခေတ်မှီတဲ့ ဖက်ဒရယ် ပြည်ထောင်စု မြန်မာနိုင်ငံတော်ကြီး ဖြစ်လာအောင် အတူတကွ လက်တွဲ တည်ဆောက်နိုင်ပါလိမ့်မယ်လို့ ယုံကြည်ပါတယ်။

အခုတော့ စစ်ပွဲဖြစ်နေတဲ့ မြန်မာပြည်မှာ အမျိုးသမီးတွေဟာ အမျိုးသားတွေနည်းတူ စစ်အုပ်စုရဲ့ ပေါ်တာဆွဲခေါ်ခြင်း၊ လုပ်အားပေးအဖြစ် ခိုင်းစေခံရခြင်း ညှင်းပမ်းနှိပ်စက် ခံရခြင်းစတာတွေကို ခံရတဲ့အပြင် အဓမ္မ ပြုကျင့်မှုတွေကလည်း မကြာခဏ ခံရတော့ စစ်ပွဲတွေရဲ့ ဒဏ်ကို ခံရတဲ့နေရာမှာ အမျိုးသားတွေထက် အမျိုးသမီးတွေက ပိုပြီးခံစားရတယ် ဆိုတဲ့အချက်ကို ဘယ်သူမှ ငြင်းနိုင်မယ် မထင်ပါဘူး။ စစ်ပွဲ မဖြစ်တဲ့ မြို့ပေါ်တွေမှာလည်း ဘုန်းနှိမ့်ကျခြင်းဆိုတဲ့ အယူသီးမှုတွေက အခုချိန်ထိ လွှမ်းမိုးနေသေးတော့ အမျိုးသမီးတွေမှာ ဘာပဲလုပ်လုပ် အတွေးအခေါ်အရ အကန့်အသတ်တွေကို ရင်ဆိုင်နေရဆဲ နှိမ့်ကျနေဆဲ ဖြစ်နေသေးတယ်။ ပညာအခြေခံ နည်းတဲ့ သာမန် အမျိုးသမီး အများစုတင်မက ဒေါ်အောင်ဆန်းစုကြည်လို အရည်အချင်းရှိတဲ့ အမျိုးသမီးမျိုး ကိုယ်တိုင်ပင် နိုင်ငံခြားသားနဲ့ လက်ထပ်ခဲ့လို့ ဆိုပြီး အတွေးအခေါ်အရ နိုင်ငံခြားသား ပိုင်ဆိုင်တဲ့ သက်မဲ့ ပစ္စည်းတခုလို သတ်မှတ်ခံရပြီး စစ်အာဏာရှင်တွေရဲ့ အကြောင်းပြချက်ထဲမှာ အဓိကအဖြစ်နဲ့ အကန့်အသတ် အချုပ်အချယ် ခံရသေးတယ် ဆိုတော့ တခြား အမျိုးသမီးတွေအတွက် ဆိုရင်တော့ ဆိုဖွယ်ရာ မရှိပါဘူး။ ဒါပေမယ့် ကျွန်မတို့ တကယ်လုပ်ချင်တဲ့ အလုပ်တခုကို ကျွန်မတို့ တကယ် လုပ်နိုင်တယ်ဆိုတာကို အလုပ်နဲ့ သက်သေပြနိုင်ရင် အမျိုးသားတွေဟာ အမျိုးသမီးတွေကို ခွဲခြားနေလို့ မဖြစ်တော့ဘူးဆိုတာ သဘောပေါက် ကြလိမ့်မယ်လို့ ကျွန်မယုံကြည်တယ်။

ဒီမိုကရေစီနဲ့ လူ့အခွင့်အရေးအတွက် တိုက်ပွဲဝင်ရာမှာ လူဦးရေ အများစုကြီးဖြစ်တဲ့ အမျိုးမီးတွေမှာ အကန့်အသတ် အချုပ်အချယ်တွေ ဘုန်းနှိမ့်တယ်ဆိုတဲ့ အတွေးအခေါ်တွေကို တွန်းလှန်နိုင်မှသာ ကျွန်မတို့ မြန်မာ့လူ့အဖွဲ့အစည်းကို တိုးတက်အောင် လုပ်တဲ့နေရာမှာ အမျိုးသားတွေနဲ့ တန်းတူရည်တူ ဆောင်ရွက်ခွင့်ရနိုင်မှာ ဖြစ်တယ်။ မြန်မာ့ လူ့အဖွဲ့အစည်းကို တိုးတက်အောင်လုပ်ဖို့အတွက် မြန်မာနိုင်ငံမှာ လူဦးရေ အများစုကြီးဖြစ်တဲ့ အမျိုသမီးတွေရဲ့ အတွေးအခေါ်တွေ အရည်အချင်းတွေ နှိမ့်ကျနေလို့ ဘယ်လိုမှမဖြစ်နိုင်ပါဘူး ဆိုတာကို အမျိုးသမီးတွေရော အမျိုးသားတွေပါ သဘောပေါက်ဖို့ လိုပါတယ်။ ဒါကြောင့်မို့ အမျိုးသမီးတွေဟာ သူတို့စိတ်ဝင်စား စိတ်အားထက်သန်တဲ့ နေရာတွေမှာ အမျိုးသားတွေနဲ့ တန်းတူ ပါဝင်နိုင်တယ် ဆိုတာကို လက်ခံပြီး အရည်အချင်းရှိတဲ့ အမျိုးသမီးတွေကို အမျိုးသားတွေက ၀ိုင်းဝန်းအားပေး ဖို့လိုပါတယ်။ ကျွန်မတို့ အမျိုးမီးတွေ ကိုယ်တိုင်ကလည်း မိမိတို့မှာ အရည်အချင်းရှိပါတယ် ဆိုတာကို ပြသပြီး ပါဝင်နိုင်အောင် ကြိုးစားဖို့ အထူးလိုအပ်ပါတယ်။ ဒါကြောင့်မို့ ကျွန်မတို့ အမျိုးသမီးတွေရဲ့ အတွေးအခေါ်နှင့် အရည်အချင်းကို မြှင့်တင်ပြီး ငြိမ်းချမ်းသာယာ ၀ဖြိုးတဲ့ ဖက်ဒရယ် ပြည်ထောင်စုကြီးကို တည်ဆောက်တဲ့နေရာမှာ အမျိုးသားတွေနဲ့အတူ ရင်ဘောင်တန်းကာ မိမိတို့မှာ ရှိတဲ့ စွမ်းအားတွေကို အစွမ်းကုန် အသုံးချကြပါစို့လို့ တိုင်းရင်းသား ညီမအစ်မများ အားလုံးကို တိုက်တွန်းလိုက်ပါတယ်။

၁၉၉၈ ခုနှစ်က Alternative Asean Network on Burma မှ ဒုတိယအကြိမ်မြောက် မြန်မာနိုင်ငံ အမျိုးသမီးများနေ့အတွက် အမှတ်တရ ထုပ်ဝေတဲ့ Voices of women in the struggle (တိုက်ပွဲဝင် အမျိုးသမီးများအသံ) စာအုပ်အတွက် ရေးခဲ့တဲ့ စာကို အင်္ဂလိပ်ဘာသာ အစီစဉ်မှ သင့်လျှော်အောင် ဘာသာပြန်ပြီး အနည်းငယ် ပြင်ဆင် ဖြည့်စွက် ပြန်လည်ဖေါ်ပြ ခြင်းဖြစ်သည်။

ဖိုးဇော်လို့ အမည်ပေးထားတဲ့ ကျဆုံးခဲ့တဲ့ ရဲဘော်ဟာ ABSDF တပ်ရင်း (၂၀၁) မင်းသမီးစခန်း၊ တပ်ခွဲ (၃) က တပ်ခွဲအရာခံဗိုလ် ရဲဘော်ဇော်နိုင်အောင်ဖြစ်ပါတယ်။ အောက်က ဓါတ်ပုံထဲမှာ အောက်ဆုံးက သေနတ်ချိန်နေတဲ့တယောက်က ဇော်နိုင်အောင်ပါ။

ဇော်နိုင်အောင်နဲ့တကွ ABSDF မှ တိုင်းပြည်အတွက် အသက်ပေးသွားသော ရဲဘော်များ အားလုံး ကောင်းရာသုဂတိလားပါစေ။ နောက်ဆုံးတိုက်ပွဲကလည်း ဒီရွာမှာပဲ ဖြစ်ခဲ့ပြီး နောက်ဆုံးတိုက်ပွဲအကြောင်းက Favorite post ဆယ်ခုထဲမှာ (သို့) ဒီနေရာမှာ ထောက်ပြီး ဖတ်နိုင်နိုင်ပါတယ်။

Posted in: ABSDF တောတွင်းဘ၀ပုံရိပ်,ခရီးသွား,မှတ်တမ်း,မျှဝေခြင်း