ပန်းသီတဲ့ကြိုး

တချိန်က

ငါ၏ပန်းခင်း၌ လှပသော ပန်းကလေးများ
ဝေဆာဖူးပွင့်နေကြသည်၊
လေယူရာ ယိမ်းနွဲ့လို့ နုပျိုစွာ လှပနေသော
အပြစ်ကင်းမဲ့သော ပန်းကလေးများ
လိပ်ပြာများ ပိတုံးတို့ ရစ်ဝဲနေသော
လှပနေသော ငါ၏ ပန်းခြံကလေး
ပွင့်သောပန်းတိုင်း လှနေ၏။

အခုတော့
လေနီတချက် ပြင်းစွာတိုက်လေပြီ
ငါ၏ခြံ၌ ပန်းကလေးများအား
ခါးသီးပြင်းထန်စွာ တိုက်လေပြီ
လေငြိမ်ချိန် ခြံထဲ ဆင်းကြည့်မိတော့
ပန်းကလေးများ တချို့ကြွေလေပြီ
အချို့ နုသစ်သော ပွင့်ဖတ်ကြွေလေပြီ
ကျန်သောပန်းများ နွမ်းချေပြီ
ငါ၏ရင်ထဲ ကျင်ကနဲ မျက်ရည် ဝေသီစွာ ခံစားလိုက်ရသည်၊
ကျန်သောပန်းများ ပို၍လှအောင် ငါ၏အလုပ်က ကြိုးစားသီရမည်။

သို့သော်
သီသောကြိုး၌ သွေးများစွန်း၍ နေလေပြီ။ ။

ရီရီထွန်း

(နေ့သစ်မှာ တင်ထားတဲ့ ၁၉၈၉ ခု၊ ဒီဇင်ဘာအတွက် ထုတ်ဝေတဲ့ ဒေါင်းအိုးဝေ အတွဲ (၁) အမှတ် (၈) မှ ပြန်လည်ကူးယူ ဖေါ်ပြပါတယ်။)

ပန်းသီတဲ့ကြိုးကဗျာလေးက သေအံ့ဆဲဆဲ သူတဦးက သေမင်းတံခါးဝကနေ ကျန်နေရစ်သူတွေကို ပြန်လှည့်ကြည့်ကာ ပြောကြားသွားတဲ့ ရင်ဖွင့်စကား (သို့) နှုတ်ဆက်အမှာစကားများ ဖြစ်သလို သေတမ်းစာလို့ ပြောမယ်ဆိုရင်လည်း မမှားပါဘူး။ ဒီကဗျာကို ရေးတဲ့ မရီရီထွန်းဟာ ၁၉၈၈ ခုနှစ်စက်တက်ဘာလမှာ စစ်တပ်အာ အာဏာသိမ်းကာ ဆန္ဒပြကျောင်းသားပြည်သူတွေကို ရက်စက်စွာ ဖြိုခွင်းခဲ့ပြီးနောက် ဒီမိုကရေစီနှင့် လူ့အခွင့်အရေးအတွက် လက်နက်ကိုင်တော်လှန်ရေးဖြင့် ဆက်လက်တိုက်ပွဲဝင်ရန် နယ်စပ်ဒေသသို့ ထွက်ခွာလာသူ ကျောင်းသူတဦးဖြစ်ပြီး ABSDF ဘုရားသုံးဆူစခန်း တပ်ရင်း (၁၀၁) မှ တော်လှန် ရေးရဲမေတဦးဖြစ်ပါတယ်။ ၁၉၈၉ ခု တော်လှန်ရေးအတွက် စိတ်ဓါတ်အပြင်းထန်ဆုံး အချိန်အခါမှာ သွေးကင်ဆာ ရောဂါ စွဲကပ်နေပြီဆိုတာ သိလိုက်ရပြီးနောက် ဆေးကုသမှု ခံယူနေစဉ် ဒီကဗျာကို စပ်ဆိုခဲ့တာ ဖြစ်ပါတယ်။ သို့သော်လည်း ကင်ဆာရောဂါကုသခြင်း ဆိုတာဟာ ပျောက်အောင် ကုသခြင်းမဟုတ်ဘဲ ပုံမှန်ဆဲလ်တွေထက် ပွားနှုန်းပိုမြန်တဲ့ ကင်ဆာဆဲလ်တွေကို ပွားနှုန်းနှေးအောင် လုပ်ပြီး အသက်ရှင်နိုင်တဲ့ သက်တမ်းကို အတတ်နိုင်သလောက် ဆွဲဆန့်ခြင်းသာ ဖြစ်တဲ့အတွက် မရီရီထွန်းဟာ ၁၉၈၉ ခု ဖေါ်ဖေါ်ဝါရီလမှာ စတင်ပြီး ထိုင်းနိုင်ငံ ဘန်ကောက်မြို့မှာ စတင်ဆေးကုသမှု ခံယူခဲ့ပြီး တနှစ်မပြည့်ခင် ၁၉၉၀ ခု ဇန်န၀ါရီလ (၄) ရက်နေ့မှာ ကွယ်လွန်ခဲ့ပါတယ်။ တိုက်ပွဲဝင်ရဲမေတဦးရဲ့ ကဗျာလေးကို ဘလော့ဂ်မှာ အမှတ်တရ သိမ်းထားရင်း အားလုံးဖတ်ဖို့ မျှဝေလိုက်ပါတယ်။ (မရီရီထွန်း ဓါတ်ပုံကို Facebook မှာ မိတ်ဆွေတဦး တင်ထားတာတွေ့လို့ ကူးယူဖေါ်ပြပါတယ်။ Nge Naing- 21/7/11).

မရီရီထွန်း ကောင်းရာသုဂတိ လားပါစေ။