Sydney Aquarium and Sydney Wildlife World

ဆစ်ဒနီ ငါးပြတိုက်နှင့် တိရစ္ဆာန်ပြတိုက်

ဆစ်ဒနီမြို့မှာ ကျွန်မ အကြိုက်နှစ်သက်ဆုံး လည်ပတ် ကြည့်ရှုရတဲ့ နေရာကတော့ Sydney Aquarium ပဲ ဖြစ်တယ်။ ဆစ်ဒနီ Aquarium နဲ့ Wildlife World က Darling Harbour လို့ ခေါ်တဲ့ ဆစ်ဒနီမြို့ရဲ့ ထင်ရှားတဲ့ မြို့လယ်တ နေရာမှာ ရှိပါတယ်။ ကျွန်မ ရောက်ခါစက ကျောင်းတက်တော့ ကျောင်းအတန်းဖ်ါတွေနဲ့အတူ Excursion တခါသွားဖူးရာကနေ နောက်ထပ်လည်း အမြဲလိုလို လည်ပတ်ဖြစ်တဲ့နေရာ ဖြစ်တယ်။ ကျွန်မကျောင်းတက်ခဲ့တဲ့ Ultimo  ကောလိပ်ရော၊ University of Technology Sydney (UTS) တက္ကသိုလ်ပါ နှစ်ခုစလုံးနဲ့ နီးတဲ့အတွက် ကျောင်းတက်စဉ် ကာလတလျှောက်လုံးလည်း ဆက်တိုက် မကြာခဏ ၀င်ကြည့်ဖြစ်ပါတယ်။ ၀င်ကြည့်တိုင်းလည်း ကျွန်မအတွက် ကြည့်ပြီးသားပြီမို့ ရိုးသွားတယ်ဆိုတာမျိုး တခါမှမခံစားရအောင် နှစ်သက်ပါတယ်။ ဗွီဒီယိုက ငါးပြတိုက်ရှိ Great Barrier Reef မှာ သွားလာနေတဲ့ ငါးတွေကို ရိုက်ထားပါတယ်။ မှန်နံရံနား လာကပ်တဲ့ ငါးတွေကိုပဲ ရိုက်ရတော့ အဲဒီအထဲမှာ ရှိတဲ့ငါး အစုံမပါပါဘူး။ ဒါပေမယ့် သွားမကြည့်ဖူး သူတွေအတွက်တော့ ကြည့်ပျော်လိမ့်မယ် ထင်ပါတယ်။

ဆစ်ဒနီ ငါးပြတိုက်မှာ ပင်လယ်ရေထွက် သတ္တ၀ါအမျိုးအစား ထေင်ချီရှိပြီး ပြတိုက်ကို ၁၉၈၈ ခုနှစ်မှာ ဖွင့်လှစ်ခဲ့တယ်လို့ သိရတယ်။ ကမ္ဘာပေါ်မှာ ရှိတဲ့ ကြီးကျယ်ခမ်းနားတဲ့ ငါးပြတိုက် ငါးခုအနက် တခုအပါအ၀င် ဖြစ်ပြီး Sydney Aquarium လိုပဲ တခြားထင်ရှားတဲ့ Aquarium တွေကတော့ Monterey Bay, California နဲ့ Osaka, Japan မှာရှိတယ်လို့ သိရပါတယ်။ ဆစ်ဒနီ Aquarium ကို နှစ်စဉ်နှစ်တိုင်း လာလည်သူ တသန်းနှစ်သိန်းခန့် ရှိပြီး ၆၀ ရာခိုင်နှုန်းမှာ နိုင်ငံခြားသားတွေ ဖြစ်တယ်လို့ သိရပါတယ်။ Aquarium နားမှာ ကပ်လျက် Wildlife World ကိုတော့ ကျွန်မတို့ ရောက်ပြီးမှ ဆောက်တာ တွေ့ရပြီး ဖွင့်တာ နှစ်နှစ်သုံးနှစ်ပဲ ရှိပါသေးတယ်။ တိရစ္ဆာန် ကြီးကြီးတွေမရှိပဲ သေးသေးတွေကိုပဲ တွေ့လို့ တိရစ္ဆာန်ရုံလောက်တော့ မစုံပါဘူး။ ဒါပေမယ့် Aquarium နဲ့ Combined ticket ၀ယ်ရင် ဈေးလည်းသက်သာတယ် ပြီးတော့ သြစကြေးလျား Native Animals တွေလည်းဖြစ်လို့ ဧည့်သည်ကိုလည်း လိုက်ပြရင်းနှင့် အခုနောက်ဆုံး ရောက်ဖြစ်တုန်းက ရိုက်ထားတဲ့ပုံတွေ ဖြစ်ပါတယ်။

ဆစ်ဒနီ Aquarium မှာ ရေထွက်တိရစ္ဆာန် အမျိုးမျိုးကို မှန်လုံခန်းထဲမှာနှင့် မှန်လုံခန်း အပြင်မှာပါ သူ့နေရာနှင့်သူ စနစ်တကျ ငါးမွေးကန်လို ထားတာ ရှိသလို အတတ်နိုင်ဆုံး သဘာဝအတိုင်း မြင်ရအောင် လုပ်ထားတာကိုလည်း တွေ့နိုင်ပါတယ်။ သီးခြားစီ တွေ့နိုင်သလို သီးခြားမဟုတ်ပဲ ငါးအမျိုမျိုးကို စုစည်းပြီးတွေ့ရနိုင်တဲ့ နေရာတွေလည်း စီစဉ်ထားပါတယ်။ အဓိက ငါးအများဆုံးနှင့် အမျိုးမျိုးကို သိုလှောင်ထားတဲ့ နေရာနှစ်ခု ရှိတဲ့အနက် တခုကတော့ Great barrier reef လို့ ခေါ်ပြီး မှန်အခန်းအကြီးကြီးနဲ့ ပင်လယ်ကမ်းနားက ကျောက်ကမ်းပါးတွေလို နေရာဖန်တီးထားပြီး အဲဒီထဲမှာ တကယ်ပင်လယ်လို သဘာဝ ပုံစံအတိုင်း ငါးအရွယ်အမျိုးမျိုးကို ပင်လယ်ထဲမှာ သွားလာလှုပ်ရှား နေတဲ့အတိုင်း မှန်ရဲ့ အပြင်ဘက်က တွေ့ရပါတယ်။ မှန်တံခါး အပြင်ဘက်ကနေ ကြည့်ပြီး ဗွီဒယိုတွေ ဓါတ်ပုံတွေ ရိုက်ယူနိုင်ပါတယ်။

နောက်တနေရာကတော့ ငါးမန်း၊ ငါးလိပ်ကျောက်တို့လို ငါးကြီးကြီးတွေပဲ ရှိတဲ့နေရာ ဖြစ်ပါတယ်။ အဲဒီနေရာမှာကျတော့ ငါးတွေက ခုနကလို သွားလာလှုပ်ရှားနေတာ ဖြစ်ပေမယ့် သူတို့က အပြင်မှာ လူတွေက ရေအောက် မှန်လှိုင်ခေါင်းထဲ ရောက်သွားပါတယ်။ ဒါကြောင့်မို့ လူတွေက မှန်ကာထားတဲ့ အတွင်းဘက်ကနေ ပင်လယ်ပြင်ထဲမှာ သဘာဝအတိုင်း လှုပ်ရှားနေတဲ့ ငါးတွေကို ကြည့်ရသလို (သို့) မှန်လှိုင်းခေါင်းထဲမှာ လှောင်ထားတဲ့ လူတွေကို ငါးတွေက အပြင်ပကနေ လာကြည့်ခံနေရသလို ခံစားရပါတယ်။ ခုနက Great barrier reef နဲ့ ကွာတာကတော့ မှန်ကာထားလို့ ငါးတွေကို အပြင်ကကြည့်လို့ မြင်ရသလိုမျိုး မဟုတ်ဘဲ လူကလှိုင်ခေါင်းထဲ ရောက်နေပြီး ငါးက အပြင်မှာ ရောက်နေတော့ ကိုယ်ကိုယ်တိုင် ငါးတွေကို ရေငုပ်ဝတ်စုံနဲ့ ပင်လယ်ထဲမှာ ၀င်ကြည့်ရသလိုပဲ ခံစားရပါတယ်။ ဒါကြောင့်မို့ Aquarium ဟာ ဆစ်ဒနီမှာ ကျွန်မအတွက် စိတ်ဝင်စားစရာ အကောင်းဆုံး လည်ပတ်ကြည့်ရှုစရာ နေရာ ဖြစ်သလို ဆစ်ဒနီကို ရောက်လာတဲ့ တခြားဒေသက ဧည့်သည်တွေအတွက်လည်း အတူတူပဲ ခံစားရလိမ့်မယ်လို့ ယုံကြည်ပါတယ်။

ရုပ်ပုံပေါ် ကလစ်နှိပ်၍ အကြီးကြည့်နိုင်ပါသည်။

အ၀င်ဝ	သားပိုက်ကောင်များ
ပင်ကွင်းများ
သားပိုက်ကောင်အုပ်စုဝင် သြကြေးလျား တိရိစ္ဆာန်တမျိုး	သြစကြေးလျား ကြက်ဆင်တမျိုး
	၀က်ဝံအမျိုးအစားတမျိုး
ငှက်တမျိုး	ကိုအားလာလို့ခေါ်တဲ့ သြစကြေးလျား တိရိစ္ဆာန်တမျိုး အစာစားနေစဉ်
ကိုအားလာလို့ခေါ်တဲ့ သြစကြေးလျား တိရိစ္ဆာန်တမျိုး အိပ်နေစဉ်	ငါးပြတိုက်မှ

ရွှင်လန်းချမ်းမြေ့ကြပါစေ။

Posted in: Australian society and environment,ဓါတ်ပုံ,ဗွီဒီယို