ဗေဒါဇွဲ

ဗေဒါဇွဲ


ပန်းဗေဒါ
အပမ်းဖြေစရာ
ကမ်းဂေဟာ ရှာသော်လဲ
လမ်းဗွေမှာ ၀ဲဂယက်တွေကြောင့်
ရုန်းထွက်ရန်ခဲ။


အဖျက်တွေ
ယှက်ပွေ နှောက်သော်လည်း
မဖေါက်ပြန် ရောက်ရန်ပန်းတိုင်သို့
ဇွဲမဏ္ဍိုင် ဘယ်မချတယ်
အောင်ရမည်ပဲ။ ။

(တော်လှန်သားကောင်း မိခင်များသို့)

နီသွေး
(၂၄၊ ၀၈၊ ၀၉)

(မျှဝေလိုသော စေတနာဖြင့် ဒီကဗျာပို့ပေးတဲ့ ကိုနီသွေးကို အထူးပဲ ကျေးဇူးတင်ပါတယ်)


ကဗျာနဲ့ ပတ်သက်လာရင် လုံးဝနားမလည်ပဲ ကိုယ်တိုင် ကဗျာစပ်မတတ်ပေယ့် ကျွန်မဘလော့ဂ်မှာ ကဗျာကို Label တခု သီးသန့်ထားရခြင်းရဲ့ အဓိက ရည်ရွယ်ချက်က မိမိဖန်တီးမတတ်တဲ့ အနုပညာ တခုကို ဖန်တီးသူများရဲ့ ရင်ထဲက ခံစားချက်နှင့် တိုင်းပြည်အပေါ် ထားရှိတဲ့ စေတနာကို ကျွန်မကိုယ်တိုင် ထပ်တူထပ်မျှ ခံစားရတဲ့ ကဗျာတွေကို ပြန်လည် တင်ပြပေးဖို့ ဖြစ်ပါတယ်။

အခု ဒီကဗျာလေးဟာလည်း အမိမြန်မာပြည်အတွက် အရာအားလုံးကို စွန့်လွှတ်ပြီး မဆုတ်နစ်သော ဇွဲလုံ့လနှင့် သူရဲကောင်းပီသစွာ ဆက်လက်တိုက်ပွဲဝင်နေတဲ့ ကျွန်မတို့ တိုင်းပြည်ရဲ့ မိခင် ဒေါ်အောင်ဆန်းစုကြည်ရဲ့ ကိုယ်ကျိုးမပါတဲ့ စွန့်လွှတ်မှုနှင့် ဇွဲလုံ့လကို ဂုဏ်ပြုစပ်ဆိုထားတဲ့ ကဗျာ ဖြစ်တဲ့အတွက် ကဗျာကို စပ်ဆိုဖန်တီးသူ ကိုနီသွေးနဲ့ ထပ်တူထပ်မျှ ခံစားရင်း ပြန်လည် မျှဝေတင်ပြလိုက်ရခြင်း ဖြစ်ပါတယ်။ စာလာဖတ်သူများအနေနှင့်လည်း ကျွန်မလိုပဲ ကဗျာရှင်ရဲ့ ဖန်တီးမှုကို ဖန်တီးသူနဲ့ ထပ်တူထပ်မျှ ခံစားနိုင်လိမ့်မယ်လို့ မျှော်လင့်ပါတယ်။


ဒီမိုကရေစီ ပန်းတိုင်သို့ ရှေ့ရူလျက်

Posted in: ကဗျာ,မျှဝေခြင်း