ပတ္တမြားရွှေဂူ

ပြစ်မရှိ ပြစ်ရှာ

လမင်းကို ခွေးဟောင်လို့
ရွှေလရောင် ပြောင်မပျက်တယ်
ထွန်းလျက်ပင်သာ။

မြရွှေဂူ ပတ္တမြားကိုလ
ဝက်များက ငြူစူစွာ
ညွန်လူးကာတိုက်နဲ။

ပွတ်လေလေ
ဂူရွှေမှာ အရောင်ထွက်တယ်
ရှေးကထက်ကဲ။

(လေးဆစ်) မန်လည်ဆရာတော်

ရွှင်လန်းချမ်းမြေ့ကြပါစေ။




(ကဗျာရဲ့ အနှစ်သာရနဲ့ မန်လည်ဆရာတော်ရဲ့ မာန်မလုပ်ချင်တဲ့ စိတ်ဓာတ်ကို သဘောကျလို့ ကူးယူဖေါ်ပြထားပါတယ်။ )

ပတ္တမြားရွှေဂူ

ကိုလိုနီခေတ်

"ပတ္တမြားရွှေဂူ" ကဗျာသည် "မန်လည်ဆရာတော်" ရေးဖွဲ့ခဲ့သော လေးဆစ်ကဗျာဖြစ်သည်။ လေးဆစ်ကဗျာဆိုသည်မှာ အချိုးအဆစ်လေးခု ပါဝင်သော ကဗျာမျိုးဖြစ်သည်။

မန်လည်ဆရာတော်၏ ငယ်အမည်သည် မောင်မာဖြစ်၍ ဘွဲ့တော်မှာ ဦးဇ၀န ဖြစ်သည်။ မာန်မလုပ်ချင်ဘု မာန်လုပ်လျှင် လွယ်သည်သာပ၊ ငယ်မည်မှာ န ကိုသတ်ရုံပဲ" ဟု ကိုယ်တော်တိုင် ရေးဖွဲ့ခဲ့ဖူးသည်။

မန်လည်ဆရာတော်ကို ကုန်းဘောင်ခေတ်နောက်ပိုင်း မြန်မာနှစ် ၁၂၀၃ (ခရစ်နှစ် ၁၈၄၂) တွင် မန်လည်ရွာ၌ ဖွားမြင်ခဲ့သည်။ ဆရာတော်သည် ပိတကဋကတ်စာပေ၊ သက္ကတစာပေနှင့် ကဗျာလင်္ကာတို့ကို ကျွမ်းကျင် တတ်မြောက်သည်။ ကျမ်းပေါင်းများစွာ ပြုစုသည့်အတွက် အဂ္ဂမဟာပဏ္ဍိတဘွဲ့တံဆိပ် ရသည်။ မြန်မာနှစ် ၁၂၈၂၊ ၀ါဆိုလ (ခရစ်နှစ် ၁၉၂၀) တွင် ပျံတော်မူသည်။

မန်လည်ဆရာတော်သည် လောကီ လောကုတ္တရာ ဗဟုသုတ စုံလင်လှသော မဟာသုတကာရီ မဃဒေ၀ လင်္ကာသစ်ကြီးကို ရေးဖွဲ့ခဲ့သည်။ ထို့ပြင် ကျမ်းဂန်အမျိုးမျိုး၊ အမေးအဖြေ အမျိုးမျိုး၊ အဆုံးအဖြတ်အမျိုးမျိုးနှင့် တေးကဗျာ အမျိုးမျိုးကိုလည်း ရေးဖွဲ့ခဲ့သည်။ မင်္ဂလာရတုပေါင်းချုပ်ကိုလည်း ရေးဖွဲ့ခဲ့သေးသည်။

ပြတ္တမြားရွှေဂူကို ၀က်များက ညွန်လူး ပွတ်တိုက်သော်လည်း မညစ်သည့်အပြင် ပိုမို၍ အရောင်ထွက်ကြောင်း ငါးရာငါးဆယ် ဇာတ်တော်လာ၂၈၅ ဇာတ်မြောက် မဏိသုကရဇာတ်ကို ယူ၍ "ပတ္တမြားရွှေဂူ" ကဗျာကို ဖွဲ့ဆိုထားခြင်းဖြစ်သည်။

(ငယ်ငယ်တုန်းက ၉ တန်းမှာ သင်ခဲ့ရတဲ့ ကဗျာကို ကြိုက်လွန်းလို့ ပညာရေး ၀န်ကြီးဌာနမှ သက္ကရာဇ် ၂၀၀၀ မှာ ပြန်လည်ထုတ်ဝေထားတဲ့ န၀မတန်း မြန်မာကဗျာ လက်ရွေးစင် စာအုပ်ထဲက ပြန်လည်ကူးယူပြီး ဘလော့ဂ်မှာလည်း သိမ်းထားရင်း မျှဝေလိုက်ပါတယ်။)

ရွှင်လန်းချမ်းမြေ့ကြပါစေ။

Posted in: ကဗျာ,ဂုဏ်ပြုအမှတ်တရ