မ၀င်းမော်ဦးကွယ်လွန်ခြင်း ၂၂ နှစ်မြောက် အောက်မေ့ဖွယ်အခမ်းအနား

အကယ်၍များ အဲဒီအချိန်က မ၀င်းမော်ဦးသာ မကျဆုံးခဲ့ပါက သူမသည်လည်း ဟောဒီလို G-3 သေနတ်ကို ခြေနဲ့နင်းပြီး ၁၆ (သို့) အေကေကို ကိုင်ကာ လက်နက်ကိုင်တော်လှန်ရေးနှင့် အာဏာရှင်ကို တော်လှန်ဖို့ နယ်စပ်ဒေသကို ထွက်ခွာလာတဲ့အထဲမှာ ပါနိုင်ကောင်းပါရဲ့လို့ ကျွန်မ တွေးမိပါတယ်။ ပုံက Face book က ကူးယူလာတဲ့ ၈၈ က တောခိုလာသူ မ၀င်းမော်ဦးနဲ့ အသက်တူ ရွယ်တူ တယောက်ဖြစ်ခဲ့တဲ့ ABSDF တပ်ရင်း ၂၀၇ ရေကျော်စခန်းက မစန်းစန်းချိုရဲ့ ၈၉ ခုနှစ်စမှာ ရိုက်ထားတဲ့ ABSDF က ထုတ်ဝေတဲ့ ပို့စ်ကဒ်ပုံ ဖြစ်ပါတယ်။






Sunday, September 19, 2010
ယနေ့  ကျင်းပသော မ၀င်းမော်ဦး ကွယ်လွန်ခြင်း (၂၂) နှစ်ပြည့် အောက်မေ့ဖွယ်အခမ်းအနား။

၁၉၈၈ ခုနှစ် စက်တင်ဘာလ (၁၉) ရက်နေ့  - လက်နက်ကိုင်အကြမ်းဘက်အာဏာရူးတို့ မှ ပြည်သူ့ အာဏာကို မတရားသိမ်းပိုက်ခဲ့သည့်နေ့  နောက်တစ်နေ့ တွင် ငြိမ်းချမ်းစွာဆန္ဒထုတ်ဖေါ်ပြသနေကြသော ရဟန်းရှင်လူကျောင်းသားပြည်သူများအား ရက်ရက်စက်စက် ပစ်သတ် သတ်ဖြတ်ခဲ့ရာတွင် ကျောင်းသူငယ်လေး မ၀င်းမော်ဦးအပါအ၀င် ပြည်သူပေါင်း ထောင်ပေါင်းများစွာ အသက်ဆုံးရှုံးခဲ့ကြရပါသည်။

ဤပုံကို ကိုဒီမိုဘလော့ဂ်မှ ကူးယူခဲ့ပါတယ်။

ထိုသို့ သော အပြစ်မဲ့သည့် ပြည်သူပြည်သားများ အသက်ဆုံးရှုံးခဲ့ကြရသည့် ယနေ့  စက်တင်ဘာလ (၁၉) ရက်နေ့  နှစ်ပတ်လည်နေ့ တွင် ရှစ်လေးလုံးပြည်သူ့ အရေးတော်ပုံကြီးကာလအတွင်း ကျဆုံးခဲ့ကြသော ရဟန်းရှင်ပြည်သူများနှင့်တစ်ကွ အာဇာနည်သူရဲကောင်း ကျောင်းသားကျောင်းသူများအား ဦးညွှတ်ဂုဏ်ပြုရင်း ကျောင်းသူငယ်လေး မ၀င်းမော်ဦး၏ မိဘများနေအိမ်တွင် မ၀င်းမော်ဦး၏ ကွယ်လွန်ခြင်း (၂၂) နှစ်ပြည့် အောက်မေ့ဖွယ်အခမ်းအနားအား ကျင်းပခဲ့ပါသည်။

ယနေ့ ကျင်းပခဲ့သော မ၀င်းမော်ဦး၏ ကွယ်လွန်ခြင်း (၂၂) နှစ်ပြည့် အောက်မေ့ဖွယ်အခမ်းအနားတွင် မ၀င်းမော်ဦး အဘွားဖြစ်သူ ဒေါ်နီ (အသက် ၈၈ နှစ်) မှာ ၂၀၀၇ ခုနှစ် ရွှေဝါရောင်တော်လှန်ရေးကာလတွင် ရဟန်းသံဃာတော်များနှင့်အတူ (၃) ရက်တိုင်တိုင် ဆန္ဒပြလမ်းလျှောက်ခဲ့သူ ဖြစ်ပါသည်။ ထိုသို့  လမ်းလျှောက်ဆန္ဒပြစဉ် ၂၀၀၇ ခုနှစ် စက်တင်ဘာလ (၂၆) ရက်နေ့ တွင် သံဃာတော်များအား နအဖအာဏာရူး လက်ပါးစေများမှ အကြမ်းဘက်နှိမ်နင်းသတ်ဖြတ်ပြုလုပ်နေစဉ် အဘွား ဒေါ်နီအား ရွှေတိဂုံဘုရား အရှေ့ ဘက်မုခ်၌ သံဃာတော်တစ်ပါးမှ နီးစပ်ရာတိုက်တစ်ခုပေါ်သို့  ပွေ့ ချီတက်ပြေးရှောင်ပုံးခဲ့ရ၍ အသက်ဘေးအန္တရာယ်မှ ကင်းလွတ်ခဲ့ရပါသည်။
(သတင်း စာသားနဲ့ အပေါ်ဆုံးက သတင်း ဓါတ်ပုံကို ကိုနစ်နေမန်း ဘလော့ဂ်မှကူးယူဖေါ်ပြ ပါတယ်။ အောက်က ဓါတ်ပုံတွေကိုတော့ ပြည်တွင်းမှ ပို့လာပါတယ်။)





ဓါတ်ပုံတွေ ပို့ပေးလာတဲ့ ပြည်တွင်းမှ ကိုမင်းထက်ကို ကျေးဇူးတင်ပါတယ်။

22 နှစ်ဆိုတဲ့ ကာလကို မနေ့တနေ့ကလိုပဲ ခံစားရပါတယ်။ ရန်ကုန်မြို့မှာ မ၀င်းမော်ဦးတို့ ကျဆုံးတဲ့နေ့ကတော့ တောက ကျွန်မတို့ အိမ်မှာတော့ ကျွန်မအဖေက ၁၀ တန်းကျောင်းသူဖြစ်တဲ့ ကျွန်မနဲ့ ၈ တန်းကျောင်းသူ ဖြစ်တဲ့ ကျွန်မညီမကို ဘယ်မှ ပေးမသွားတော့ဘူး။ သီးသန့် ပို့စ်ရေးဖို့ အချိန်မရခဲ့လို့ လွန်ခဲ့တဲ့ ၂၂ နှစ် ဒီလိုအချိန်က အကြောင်းကို မနေ့တနေ့ကလို ပြန်ခံစားရပြီး အဖေနေ့ အမှတ်တရ ပို့စ်ထဲက စာနှစ်ပိုဒ်ကို ထပ်ဆင့်မျှဝေလိုက်ပါတယ်။


စစ်တပ်အာဏာသိမ်းပြီးတာနဲ့ အဖေရဲ့ ရာဇအသံကလည်း စတော့တာပဲ။ "မီးငယ်နဲ့ ဌေးငယ် သမီးတို့ ပါချင်လို့ ပေးပါပြီးပြီ ဒီလောက်ဆိုလုံလောက်ပြီ သမီးတို့က ခေါင်းဆောင်လည်း မဟုတ်လို့ အများနဲ့ ဖြစ်တဲ့ကိစ္စမို့ ဘာအပြစ်မှ မရှိဘူး ခေါင်းဆောင်တွေပဲ အပြစ်ရှိတယ်။ ဒါကြောင့် သမီးတို့ကို သက်ဆိုင်ရာက ဘယ်သူမှ ပြဿနာရှာလို့မရဘူး သူများတွေလို ပုန်းရှောင်ဖို့လည်း မလိုဘူး၊ သူပုန်တွေဆီ သွားဖို့လည်း မလိုဘူး အိမ်မှာ အေးအေးဆေးဆေး နေကြ ဘာပြဿနာမှ မဖြစ်စေရဘူး" လို့ ရာဇသံစပေးနေပြီ။ ကျွန်မတို့ မောင်နှမမှာ သမဂ္ဂက ဘယ်အဖွဲ့က ဘယ်ရောက်နေတယ် ဘယ်အဖွဲ့က တောထဲသွားစဉ် ရေနစ်ပြီးလည်း လမ်းမှာ သေဆုံးကြတဲ့သူတွေလည်း ရှိတယ် စသည့် မဟုတ်တာရော ဟုတ်တာရော အမျိုးမျိုး ကြားနေရတယ်။ တောထဲ ရောက်သွားသူတွေရဲ့ အခြေအနေကို စဉ်းစားချိန်မှာ VOA နဲ့ ဘီဘီစီ က ကျွန်မတို့အတွက် သတင်းရရာ နေရာတွေ ဖြစ်လာတယ်။ ခါတိုင်း ဘီဘီစီပဲ နားထောင်ပြီး နောက်ပိုင်းတော့ ဗွီအိုအေက နယ်စပ်ရောက် ကျောင်းသားတွေ အခြေအနေ ပိုပါတော့ စစ်အာဏာသိမ်းပြီးနောက်ပိုင်းမှာ VOA ကို ပိုကြိုက်သွားပြီး ပိုနားထောင်ဖြစ်တယ်။ အဲဒီအချိန်မှာ သိပ္ပံသတင်းဆောင်းပါးတွေပါလို့ VOA ကောင်းကြောင်း တလျှောက်လုံး ပြောလာခဲ့တဲ့ အဖေက VOA သတင်းကြေညာနေတာကို ကြားရင် လူငယ်တွေ လမ်းမှားရောက်အောင် သွေးထိုးပက်ကော်နေတယ် ဆိုပြီး စတင်အပြစ်တင်ရှုပ်ချတာကို တွေ့ရလို့ ကျွန်မတို့ ညီနှမကတော့ ပြောမရဲလို့ ဘာမှမပြောပေမဲ့ ဘာမှဆိုင်တာလည်း မဟုတ်ဘူးလို့ ကြိတ်တွေးနေတယ်။ ရေဒီယိုက စစ်အစိုးရလို့ ပြောတာကို အဖေဟာ ဆတ်ဆတ်တုန်အောင် နာတာတွေ့တော့ စစ်အစိုးရကို စစ်အစိုးရမခေါ်လို့ ဘယ်လိုခေါ်စေချင်လဲ မသိဘူးလို့ စိတ်ထဲထဲမှာ ပြောနေတယ်။

ကျွန်မတို့ကလည်း တခြားသူတွေနဲ့ အဆက်အသွယ်ရအောင် ဘယ်လိုလုပ်ရမလဲလို့ အမြဲတွေးတော ကြံဆနေတယ်။ အဖေကလည်း ရိပ်မိလားမသိဘူး တနေ့ထက်တနေ့ တင်းကြပ်လာပြီး နောက်ပိုင်း သတင်းတောင် ကောင်းကောင်း နားထောင်လို့မရအောင် ဖြစ်လာတယ်၊ ကျွန်မတိုကိုလည်း စစ်လားဆေးလား လုပ်လာတယ်၊ ရုတ်ရုတ်လုပ်ရင် လူသတ်ပြီး ထောင်ထဲသွားနေဖို့ ၀န်မလေးဘူးတွေ ပြောလာတယ်ဆိုတော့ ကျွန်မတို့လည်း ဒီအတိုင်းတော့ ရေရှည် မဖြစ်တော့ဘူးဆိုပြီး စတင်ကြံဆတော့တယ်။ နောက်ဆုံးတော့ ကျွန်မတို့က တံငါရွာမှာ ရှိတဲ့ အမေ့ဆွေမျိုးတွေဆီ သွားလည်ပြီး ခြံထဲက သစ်သီးဝလံတွေကို လက်ဆောင်သွားပေးမယ်လို့ ပြောတော့ တွေမျိုးတွေက ဒီလိုသွားလည်ရင် ငပိ၊ ငါးခြောက် ငံပြာရည်တို့ လက်ဆောင်ပြန်ပေးလေ့ရှိတော့ မဆိုးဘူးထင်ပုံရတယ် ပင်လယ်ဘက်ဆိုတော့ သူပုန်နဲ့ ဝေးတယ် မဟုတ်လား အဖေက ကျွန်မတို့ အကြံအစည်ကို လက်ခံခဲ့တယ်။ တကယ်တမ်း အိမ်ကနေ ကျွန်မတို့ ထွက်လာတာကတော့ ပင်လယ်ဘက်မှာ ရှိတဲ့ တံငါရွာဆီကိုမဟုတ်၊ ပင်လယ်နဲ့ ဆန့်ကျင်ဘက် တဘက်ကမ်းက ကရင်တွေရဲ့ အကူအညီနဲ့ KNU ကို ဆက်သွယ်ကာ တောင်တန်းတွေ ရှိရာ နေရာကိုသာ ဖြစ်ပါတယ်။ KNU တွေရဲ့ အကူအညီနဲ့ တောင်တန်းတွေ တောတောင် စမ်းချောင်း အထပ်ထပ်တွေကို ကျော်ဖြတ်ကာ သမဂ္ဂတုန်းက လုပ်ဖေါ်ကိုင်ဖက်တွေ အရင်ရောက်နေပြီဖြစ်တဲ့ နယ်စပ်ဒေသဆီ ညီအစ်မ နှစ်ယောက် ခရီးဆက်ခဲ့ပါတယ်။ ( ၂၂ နှစ်ဆိုတာ ဘာမှကို မကြာလိုက်သလိုပါပဲ၊ အဖေနေ့ အမှတ်တရပို့စ်က အဲဒီချိန် အဖြစ်အပျက်ကို ထင်ဟပ်တဲ့ စာနှစ်ပိုဒ်ဖြစ်ပါတယ်။)




မ၀င်းမော်ဦးနဲ့ ကျဆုံးသွားသော အာဇာနည်များ ကောင်းရာသုဂတိလားပါစေ။
စစ်အာဏာရှင်စနစ် မုချကျဆုံးရမည်
ဒီမိုကရေစီ တော်လှန်ရေး မုချအောင်ရမည်။

Posted in: ဂုဏ်ပြုအမှတ်တရ