ငြိမ်းချမ်းရေးအတွက် တိုက်ပွဲ

ငြိမ်းချမ်းရေးအတွက် တိုက်ပွဲရှိရမယ် ဆိုတဲ့ ရင်းနှီးနေတဲ့ အသံကို အများနားဆင်နိုင်စေရန် ပြန်လည် ဖေါ်ပြလိုက်ပါတယ်။ ကိုမွန်းအောင်အသံက လွန်ခဲ့တဲ့ အနှစ်နှစ်ဆယ်ကာလကလို ထပ်တူမကျသည့်တိုင် အခုထိ ကောင်းနေဆဲပါပဲ။ အရင်တင်ထားတဲ့ မိုးမခပင်အောက်က ဘ၀တွေကို ပြန်လည်အမှတ်ရခြင်း ပို့စ်မှာ တင်ထားတဲ့ တေးရေးဆရာ ကိုနေ၀င်းကိုယ်တိုင် သီဆိုထားတာကိုလည်း အတူယှဉ်တွဲ နားဆင်နိုင်ရန်အတွက် မူရင်းပို့စ်ကနေ ပြန်လည် ကူးယူလာပြီး ထည့်ထားပါတယ်။ ကိုမွန်းအောင် အခုဆိုထားတဲ့ သီချင်းကိုကျတော့ We fight we win blog မှာ တင်ထားတာ တွေ့လို့ ပြန်လည်ကူးယူ ဖေါ်ပြခြင်း ဖြစ်ပါတယ်။ မိုးမခပင်အောက်မှာ ကျွန်မတို့ မရှိတော့ပေမဲ့ ဘ၀တွေများစွာ ရှိနေဆဲပါပဲ။ ဒီသီချင်းကို စပ်ဆိုသူ တေးရေးဆရာ ကိုနေ၀င်းကိုတိုင် သီဆိုထားတာနဲ့ ကျွန်မတို့ရဲ့ မိုးမခပင်အောက်မှာတုန်း ဘ၀အစိတ်အပိုင်းတချို့ကို ဆက်လက်နားဆင် ကြည့်ရှုခံစားနိုင်ပါတယ်။

အောက်ဆုံးပိုဒ်
Battle for Peace from kaungkin on Vimeo. ဒီသီချင်းကို ကျွန်မ အများဆုံး ကြားခဲ့ဖူး ဆိုခဲ့ဖူးတာ တောတွင်းကာလက ဗားတိုက်တွေရှ့မှာ၊ မြစ်ကမ်းနံဘေးက မိုးမခပင်တွေအောက်မှာ၊ သင်တန်းတွေမှာပဲ ရဲဘော်တွေ စုပြီး ဆိုခဲ့တာကို ကြားခဲ့ရ သင်တန်းမှာ ကိုယ်တိုင်ပါဝင် ဆိုခဲ့ရတာကိုပဲ သိပါတယ်။ အိမ်ခန်းထဲမှာ ရှိနေစဉ် ဒီသီချင်းအသံကို ရုတ်တရက် ကြားလိုက်တော့ Face book မှာ တယောက်ယောက် ဆိုပြီး တင်ထားတာကို အမျိုးသားက ဖွင့်ကြည့်နေတယ် ဆိုတာသဘောပေါက်လိုက်ပြီး ငါတို့တောထဲမှာတုန်းက ဆိုတဲ့သီချင်းကို ဘယ်တပ်ရင်းက ရဲဘော်ဟောင်းတယောက်က အသံသေးအသံကြောင်နဲ့ ပျက်စီးအောင် လုပ်နေပြန်ပြီလဲမသိလို့ တွေးနေခဲ့တယ်။ မငယ် ဒီမှာလာကြည့်လို့ ခေါ်လိုက်လို့ ထွက်လာကြည့်မှ ကျွန်မ ထင်တာနဲ့ တခြားစီဖြစ်နေတာကို တွေ့ရတယ်။ ဒီသီချင်းကို ကိုမွန်းအောင် တယောက်ကလွဲရင် ဒီလို Professional အဆိုတော်တွေ တီးဝိုင်းသမားတွေ ဆိုတာလည်း တခါမှ မကြားဖူးဘဲနဲ့ အခုလို ရုတ်တရက် တွေ့လိုက်၊ ကြားလိုက်ရတော့ တကယ်ကို အံ့သြမိပါတယ်။ တေးရေး၊ တေးဆို ကိုနေ၀င်းဆိုတော့ ဒီသီချင်းက ကျွန်မတို့ တော်လှန်ရေးက သီချင်းပဲလို့ ထင်ခဲ့လို့ ထပ်ပြီး အံ့သြရပြန်တယ်။ တကယ်တော့ ဒီသီချင်းက တချိန်က ကျွန်မတို့ရဲ့ ဘ၀တွေကို ပုံဖေါ်ခဲ့တဲ့ သီချင်းဖြစ်လို့ ကျွန်မရဲ့ အတွေးတွေကို လွန်ခဲ့တဲ့ ၁၅နှစ် အနှစ် ၂၀ ကဘ၀တွေဆီ ပြန်ရောက်သွားစေပါတယ်။

မူရင်း က ကောင်းကင် (နိုင်ငံပြု အနုပညာမဂ္ဂဇင်း) က သီချင်းကဏ္ဍမှာ ရှိပါတယ်။

သီချင်းစာသား

အေးအေးငြိမ့် စိမ့်ရေ စီးတဲ့ မြကန်
တိုးတိုးလေး ဖွဲ့ဆို တေးသီချင်းတပုဒ်ကို
မှေးစက်မယ့် ဆိတ်ငြိမ် ညတို့ရှိစေ
နီတဲ့သွေး ရဲရင့်လို့ ခြေကိုလှမ်း ရှေ့ကို ချီတက်ခဲ့ပြီ...


ရင်းထားတဲ့ အသက်တွေ အစားထိုးပေးလှူ
ကိုယ့်ဘက်က အလှည့်ကို ရောက်မှမနွဲ့သာ
စိုက်ခဲ့သမျှတို့ရိပ်သိမ်းရတော့မယ်
အခါတိုင်ပြီ လက်မလွှတ်နဲ့ မကျေတဲ့အကြွေး ဆပ်ရန် ချီတက်ခဲ့ပြီ


မိုမခပင်တွေ တို့သက်သေတည်
စိမ်းယဉ်သော အေးမြကန်သာမြေ
(ရိုးမတောင်ခြေ နေရောင်မခတဲ့ တောင်တွေ
ငြိမ်းချမ်းစေ)၂

စိုးစဉ်းမျှ စိုးရိမ် ကြောက်စိတ်မရှိတယ်
ခင်းထားတဲ့လမ်းဟာ တို့ရဲ့သစ္စာ
ငြိမ်းချမ်းရေးအတွက် တိုက်ပွဲရှိရမယ်
နီတဲ့သွေး ရဲရင့်လို့ ရန်သူမင်းရှေ့ကို ချီတက်ခဲ့ပြီ
မိုမခပင်တွေ တို့သက်သေတည်
စိမ်းယဉ်သော အေးမြကန်သာမြေ
(ရိုးမတောင်ခြေ နေရောင်မခတဲ့ တောင်တွေ
ငြိမ်းချမ်းစေ...)၂






တော်လှန်ရေးကာလက ဓါတ်ပုံတချို့ကို ကိုလှိုင်ဘွား Face book မှ ကူးယူဖေါ်ပြထားပါတယ်။ ကျွန်မရဲ့ Face book မိတ်ဆွေများအနေနဲ့ တခြား တောတွင်းကာလ ဓါတ်ပုံတွေကို ကျွန်မ Facebook က မိုးမခပင်အောက်က ဘ၀ ဆိုတဲ့ album ခေါင်းစဉ်အောက်မှာ သွား ကြည့်နိုင်ပါတယ်။

မူရင်း ကို ကောင်းကင် (နိုင်ငံပြု အနုပညာမဂ္ဂဇင်း) မှာ တင်ထားတာ ရှိပါတယ်။

Posted in: ABSDF တောတွင်းဘ၀ပုံရိပ်,မှတ်တမ်း,မျှဝေခြင်း,သီချင်း